فى يوم صيفى حار الا لاهوب و السياره كأنها فرن و المكيف ما يسوى شئ من الواهى
و بزحمة الشارع قعدت اقلب القنوات بالراديو
والا دكاتره يتكلمون عن موضوع الرشوه عند الاطفال
يعنى شلون تساحل الياهل و تقوله اذا سويت جذى اعطيك هالشئ
اهنى قعدت افكر
بدايه لازم نعرف شنو يعنى رشوه
فى اللغة: يُقال الرَّشوة- الرُّشوة- الرِّشوة: الجُعْل
فى الشرع: ما يُعطى لإبطال حق أو لإحقاق باطل
و قلت اصلا بالدين اكو ثواب و عقاب
جان استوعب ان عادة احنا نرشى الياهل العسر الشيطان اللى ما يسمع الكلام
يعنى مو اذا سوا شئ زين يبنا له هديه
فجذى اذا اكو طفل ما يطلع منه الا الشطانه علشان نفتك منه و نخليه يسمع الكلام نرشيه
بالتالى هذا يكبر و يعرف ان اذا صار راعى مشاكل و متمرد
راح يحصل اللى يبيه
وطبعا كل ما كبر زادت الطلبات و حجم الرشوه
بالنهايه و بدون قصد و علشان يفتكون الاهل من حنه عيالهم يربونهم على الفساد المقنع
ترى السالفه جد و مو غشمره
الجيل اللى يطلع منهم اش راح يسوى بمحيطه
سواء على الصعيد الاسرى البحت او العام
انا اعتقد لغة الحوار بين الاهل وعيالهم تكاد تكون معدومه
أولياء امور وايدين... الا من رحم ربى منهم مجابل عياله و يعلمهم مكارم الاخلاق
اما البقيه الله يهديهم مخلينهم على راحتهم
اذكر اول بالمدرسه كنا نخاف من المدرسين و نحترمهم
الحين اشوف عيال هالوقت ما يحترمون احد
ولاحظوا ان احنا
نسبه كبيره منا مواليد الثمانينات و التسعينات
واولياء الامور من موايد الستينات والسبعينات
الجيل الذهبى
يعنى النقله اللى قاعده تصير باخلاقيات عيالنا بعد عشر سنوات من الحين بتسوى كارثه اجتماعيه
طبعا اكو حل لكن بعيد المدى
هذا اذا نبى حياة راقيه بنقاشاتها
لازم نربى عيالنا صح علشان مع الوقت تتغير النظره التشاؤميه العامه
وما اعتقد ان اى انسان يبى عياله او حتى اى شخص من اهله يكون مرتشى
التوقيع
د.براقش
دكتوراه بعلم النفس البشرى
جامعه الوفره-قسم نعناع المدينه
ماجستير العلاج النفسي بالتنويم الإيحائي
جامعة كاتمندو -نيبال
رئيس قسم الطب النفسى
كلية الربع الخالى العسكرية
بكالريوس علم النفس الإكلينيكي والتحليل
جامعة جزرالقمر
حاصله على شهادات فى التدريب والتأهيل النفسى
جامعة ام المرادم
رئيس قسم التخدير من جامعة معترف بها
اخذت هالشهاده لاحتماليه احتياجها بيوم من الايام
