القشه التى قصمت ظهرى

قرار الانفصال عن شئ له معنويا مكان كبير صعب

التعايش مع التغيير بعده صعب

وليس مستحيل للعلم فقط

تحويل المشاعر و الانفعالات الى اتجاه اخر للتنفيس مقدور عليه

البكى ما يقول لأ

وهذى القصة

الاحد الصبح طلعت من البيت كعادتى متجهه للمنفى و المقصود فيه الدوام

حسيت بقثى قلت ارجع اجابل امى على الاقل سوالفها صج تحر لكن احبها

وانا داشه الفريج و الا فريق الازاله مشتط

ما ظلت نخله و زرعه ما شلعها من بيوت الجيران

دشيت البيت وانا اتحلطم

شوى والا واصلين بيتنا

يتحججون بممر اهما بالاساس مسكرينه

اهنى جان انفجر من البكى

امى اخترعت و ما قلت لها ليش لان مابيها تحس بتأنيب ضمير

والحين بقول لكم ليش

اول ما سكننا بيتنا ابوى اشترى حقى نخله برحيه

عمرها من عمرى و كل يقول لى اذا تزوجتى و صار عندك بيت تاخذيها

من صجى كنت اسقيها ماى و اذكر حارسنا بوقت التلقيح

واحرم اخوانى من انهم ياكلون منها اذا تخانقت معاهم

كانت لى ذكريات وايد حلوه معاها

المهم كان عندنا بالحديقه الخارجيه ديوانيه من موديلات الحريم يعنى ديكورات و سوالف

امى اول ما بدا فريق الازاله بشيل من البيوت باول السنه دخلتها داخل البيت

وطبعا علشان يكون لها مكان شالت نخلتى

بذاك الوقت اكتفيت بتصوير شلعتها من الالف الى الياء و قلت هذى بقايا الذكريات

لكن لسبب او لاخر كانت القشه امس وقلبى يعورنى

وتعبت من كل شئ و زعلت

ادرى ما تسوى

لكن وصلت الى مرحله احس فيها ان مو لازم اتعلق باى شئ

ما اتحمل

صايره ترفة المشاعر